Номин Талст

Монголын анхны хөвгүүдийн хамтлагийн нэгээр зүй ёсоор нэрлэгдэх тус хамтлаг нь 1997 онд албан ёсоор байгуулагдсан. Түүнээс өмнөх түүхийг сөхвөл 1995 онд “Номин” нэртэй дууны хамтлаг, 12 бүжигчнээс бүрдэх “Талст” хэмээх бүжгийн хамтлагтай нэгдэж “Сүүлчийн удаа”, “Гэрэл сүүдэр” зэрэг анхны уран бүтээлүүдээ гаргаж байсан. Удалгүй хамтлагийн ахлагчдын шийдвэрээр бүтцэд өөрчлөлт оруулан Хаянхярваа, Дэлгэрмөрөн, Хангэрэл нарыг элсүүлэн 1997 онд албан ёсоор Номин Талст хамтлаг байгуулагдсан түүхтэй. Тэд 2007 онд 10 жилийн ойн тоглолтоо зохион байгуулснаас хойш хамтлагийн уран бүтээл хэсэг завсарлаж, гишүүд тус тусын уран бүтээлийг гаргах болсон. Хамтлаг уран бүтээлээ эрчимтэй хийж байсан тухайн үед Монголын рок, поп урлагийн дээд шагнал гардуулах Пентатоник наадмаас Шилдэг дебют хамтлаг (1998), Шилдэг поп цомог (2000), шилдэг поп хамтлаг (2002), шилдэг поп дуу (2003) зэрэг шагналуудыг тус тус хүртэж байсан билээ. • Гэрэл сүүдэр (2000) • Ээждээ (2001) • Татах хүч (2002) • Нэмэх хасах цэнэг (2003) • Бидний үе (2005) • Best of Nomintalst (2006) • 2014 (2014)