Алтан ураг

Хамтлагийн гишүүд 2001 онд Хөгжим Бүжгийн Коллежийг ардын хөгжмийн мэргэжлээр төгсөж, улмаар “Сарны чулуу” чуулгад ангийн төгсөгчдийн хамт нэгдэн орж, жилийн дараа -002 онд хамтлагаа байгуулсан түүхтэй. Монголын үндэсний хөгжмийг уламжлалт болон орчин үеийн дуугаралттай хослуулан уран бүтээлээ туурвидаг тус хамтлаг нь өв соёлоо дэлхий дахинаа таниулахын сацуу залуучуудад эх түүх, өв уламжлалаараа бахархан дээдлэх эдлийг төрүүлэх, соёл сэтгэхүйг түгээх чин хүслээр уран бүтээлээ гаргадаг. Тэд анхны цомог болох “Унага төрөв”-ийг 2004 онд гаргасан бөгөөд фолк рок урсгалын “Алтан Урагт үйлдвэрлэв” цомгоо 2006 онд гаргасан юм. Харин үүний дараачаар гаргасан 5 цомгоо 5 өөр урсгалаар гаргахыг зорьж, үүн дотроо контемпорари, фолк рок, ардын дуу, этник болон киноны аязуудаар тус тус цомгуудыг бүтээжээ. Тэд oлон улсад 186 удаагийн аялан тоглолт, урлагийн наадам зэрэг арга хэмжээнд оролцсон туршлагатайн дээр хэд хэд олон улсын наадмуудаас уран бүтээлээрээ шагнал хүртэж байсан амжилттай. Түүнчлэн, 2010 онд Broadcast Music, Inc. (BMI) байгууллагад Монгол Улсаас анх удаа гишүүнээр элссэн. BMI нь олон улсын Дэлхийн хөгжмийн зохиолч, ая зохиогч, хамтлаг, дуучид, уран бүтээлчдийн зохиогчийн эрх, оюуны өмчийг дэлхий дахинд хамгаалах, түгээх, хөгжим ашиглагч бүхий л байгууллагуудад зохиогчийн эрхийн дагуу лиценз олгох үйлчилгээг үзүүлэгч байгуулага юм. Бүрэлдэхүүн: • Б.Эрдэнэбат (хамтлагийн ахлагч, хөгжмийн зохиолч, продюсер, ёочин, төгөлдөр хуур ) • М.Чимэдтогтох (Ардын бишгүүр, хөөмий) • Ц.Гангаа (их хуур, басс) • П.Оюунбилэг (морин хуур, хөөмий) • Б.Болортунгалаг (бөмбөр, цохиур хөгжим) • Б.Бүрэнтөгс (цахилгаан морин хуур) • Х.Эрдэнэцэцэг (уртын дуу, ардын дуу, богино дуу) Цомог: • Унага төрөв (2004) • Алтан Урагт үйлдвэрлэв (2006) • Ховс (2008) • Цус (2009) • Үндэстэн (2010) • Эрт урьдын цагт Монголд (2010) • Монгол (2010)