Lumino

Люмино хамтлаг нь 1998 онд албан ёсоор уран бүтээлээ туурвиж эхэлсэн бөгөөд MC, Skitzo, Baji, Хөлгөө, Чинзоо гэсэн 5 хүний бүрэлдэхүүнтэйгээр байгуулагдсан. 2000 оны сүүлээс 3 хүний бүрэлдэхүүнтэй болж, улмаар 2013 онд хамтлагт DJ Zolo нэгдсэн. Хамтлаг байгуулагдсан цагаасаа хойш 2006 оныг хүртэл уран бүтээлээ идэвхтэй туурвиж, энэ хугацаанд 5 цомог, 30 гаруй видео клип, 20 гаруй бие даасан тоглолт, нэг бүрэн хэмжээний уран сайхны кино (Танихгүй охины захидал) уран бүтээл гаргасан. Хамтлагийн дуунуудын ихэнхийг МС продюсерлэж, Аранза хөгжмийн найруулгыг хийн, видео клипийг Zaya’s студийн Даваахай нар хамтран бүтээдэг байв. Мөн энэ хугацаанд тухайн үеийн Монголын хөгжмийн дээд шагнал болох “Пентатоник” академийн 4 цом хүртжээ. Ийнхүү 2008 оноос хамтлагийн гишүүд бие даасан уран бүтээл хийж эхлэв. Skitzo буюу Анхаа “Cuthberth” нэрээр Модерн Номадстай хамтарсан chillout стилийн цомог гаргаж, 2009 оноос МС өөрийн соло дуунуудыг сонсогчдод хүргэж улмаар 2011 онд Platinum beatz, Romantic beatz гэсэн бие даасан хос цомог гаргасан. Түүнчлэн орчин цагийн хөгжмийн тухай өгүүлэх “The Secret of Rap” номоо бичиж, өөрөө редакторлон гаргасан билээ. 2009 оноос Baji соло RnB дуунуудыг олны сонорт хүргэж эхэлсэн. 2012 оноос гишүүд хамтлагийн уран бүтээлдээ эргэн орж, “Хэмнэл нэрэгч” төслийг хэрэгжүүлэн, шинэ уран бүтээлүүд, аялан тоглолтуудыг ар араас нь хийсэн юм. • Энд гарч ирэв (2001) • Ирээд буцсан хайр минь (2002) • Гэрэлт хорвоод (2004) • Ламба гуайн нулимс (2005) • Хуучин сургууль (2006)