Харанга

Анх 1989 онд Драмын Театрын дэргэд албан ёсоор байгуулагдаж байсан. Гэхдээ үүнээс ч өмнө 1975 онд Ц.Энхманлай, Я.Одсүрэн нар хамтлаг байгуулах тухай ярилцаж, дуулж байсан үеэс “Харанга” хамтлагийн түүх эхлэх нь зүйтэй гэж фенүүд нь үздэг. Хамтлагт тохирох нэрийг өгөхөөр Драмын театр, Ардын дуу бүжгийн чуулгын бүх уран бүтээлчид дунд нэрийн уралдаан зарлаж, тус уралдаанд "Улаанбаатар", "Бат хаан" зэрэг олон олон нэрийн саналууд ирснээс Ардын дуу бүжгийн чуулгын бүжигчин Д.Сүхбаатарын санал болгосон Харанга гэж нэрийг сонгожээ. Хамтлаг анхны тоглолтоо 1989 оны 10-р сарын 26-нд тоглохоор товлож, тухайн өдрийнхөө 15 цагт Соёлын Яамны хурлаар оржээ. Монголын урлаг соёлын алдартай эрхмүүд шүүн хэлэлцдэг тус хурал нь хатуу шүүлтүүр дунд өрнөдөг бөгөөд эл хурлаар шигшигдсэн сүүлчийн хамтлаг Харанга байв. Ийнхүү хурал дуусмагц тасалбараа худалдаалж эхлээд 30 минутын дотор бүх тасалбар зарагдаж дуусжээ. Ардын цэргийн армид байхаас нөхөрлөж нэгдэн, хамтлагаа анх үүсгэн байгуулах, анхны тоглолтоо хийх гээд бүхий л үйл явц нь хатуу шалгуур дунд өрнөсөн тус хамтлаг Монголын түүхэнд бүрэн бүрэлдэхүүнээрээ МУ-ын Төрийн шагнал хүртсэн анхны бөгөөд одоогоор цорын ганц хамтлаг юм. Тэдний рок поп хөгжмийн урлагт оруулсан хувь нэмрийг нь үнэлж, 2016 онд "Харанга" хамтлагт Алдрын од гардуулсан бөгөөд Соёлын төв өргөөний гадна талбайд тус хамтлагт зориулан хүндэтгэлийн индэр босгосон билээ. • Эрин зууны хөг (1997) • Best of Haranga (1997) • Бодлын тэнгис (2000) • Ертөнцийн өнгө (2003) • Special Edition Gold (2007) • Амьдрал-2 (2017)