PORTRAITS (Live at the Mongolian State Philharmonic) (ft Zolzaya Batsukh)
ҮУИТеатрын концертмейстер, гоцлол хөгжимчин Э.Цэндсүрэнгийн “Portraits Live at the State Philharmonic” цомог нь түүний Улсын Филармонид хийсэн “Дотоод хөрөг” тоглолтоос хийсэн бичлэгийн бүтээл билээ. Тус цомог нь монголын болон дэлхийн орчин үеийн хөгжмийн бүтээлүүдээс бүрдсэн бөгөөд 2021 оны 3-р сараас Apple Music, Spotify тэргүүт дэлхийн 7 цахим дэлгүүрээр худалдаалагдаж, 7-р сараас биет цомгоор сонсогчдын хүртээл болсон билээ. Энэхүү цомогт багтсан бүтээлүүдийн 90 хувь нь Монголын хуучрын урын санд шинээр хөгжимдсөн бөгөөд цомог бүхэлдээ хүний дотоод ертөнц, сэтгэлийн халил, зан араншин, дүр төрхийг олон талаас өгүүлэх учраас Portraits хэмээн нэрлэсэн. Уг цомгоор Монгол ардын нумт хөгжмийн зэмсэг болох хуучир хөгжмийн өнөө цагийн түвшинг тольдож болох ба монголын мэргэжлийн хөгжмийн урлагийн, түүн дундаа хуучир хөгжмийн цөөн тооны цомгуудад шинэ уур амьсгал оруулж чадсан бүтээл болсон хэмээн үзэж буй. Тус цомогт багтсан бүтээлүүдээс дурдвал Америкийн хөгжмийн зохиолч Жорж Гершвенийн “It ain’t necessarily so”, Мануэл Понсе “Эстрелита” зэрэг бүтээлүүдийг хөгжимчин Э.Цэндсүрэн нь өөрөө хуучирт хөрвүүлж тоглосон бол Хятадын өнөө цагийн хуучрын урын сангийн онцлох бүтээлүүд болох Жин Фу Зай, Ли Юан Чин, Ли Бо Чан зэрэг хөгжмийн зохиолчдын бүтээлүүдийг шилж оруулсан нь монголын сонсогчдыг Хятадын орчин цагийн хуучрын урын сантай танилцуулсан билээ. Түүнчлэн Ж.Энхбаярын хийл, симфони найрал хөгжимд зориулсан “Рапсоди”, С.Соронзонболдын “Концерт” зэрэг монгол бүтээлүүд нь уламжлалт хөг эгшиглэнг орчин цагийн стиль, гармониор баяжуулсан бүтээлүүд ба цомог бүхэлдээ ур чадвар талаасаа олон улсын зах зээлд өрсөлдөхүйц дан хөгжмийн нэгэн төрлийн экспорт бүтээгдэхүүн болж чадах юм.
